طريقة صنع الشعيبيات

ارجو ممن يعرف طريقة تحضير الشعيبيات ان يكرمنا بها ؟؟ وشكرا

أضم صوتي إلى صوتك ....
بس ياريت تكون الطريقة منزلية ....

وشيف المنتدى أكيد مارح يقصر ....
بس على الله يمر على الموضوع ....

تكرم عيونكم بس ارجع عالبيت بخلي اختكم ام محمد تكتبلي الطريقة وبحطلكم صورة الشعيبيات بعد النضج
والف صحة وعافية واتوقع حسب ما اتذكر انو السنة الماضية حطيتلكم صورة صدر شعيبيات صنع بيتوتي

لا تشهونا ع الشعيبيات
انا كتير بحب الحلو
كنت اعملهم بالبيت لما كنت بسوريا بس نسيت الطريقة
يلللا ابو محمد الطريقة بسرعة
او بتعزمنا لعندكم

ياستي شايفك كتير مستعجلة عليهون لذلك اتصلتلك على ام محمد واخذت الطريقة منها عالتلفون
المقادير:
5 كاسات طحين فاخر
ملعقة بيكنغ باودر
رشة ملح
---
التحضير:
يعجن الخليط بماء ساخن وبشكل جيد وبعد ان يتم اخذ القوام النهائي للعجين(تجانس) يقطع على شكل كرات الواحدة تقريبا بحجم البيضةاو اكبر قليلا
والشطارة بطريقة الرق للعجين انتبهي منيح::
يتم رق العجين بشكل استطالة بالشوبك بحيث يصبح العرض بمقدار الكف والطول شي 30 سم ثم تدهن بزبدة وتطوى على بعضها ثم يعاد رقها بالشوبك لتصل لنفس الشكل السابق وكذلك تدهن بالزبدة ثم تدرج على شكل لفافة طولها بعرض الكف تقريبا ثم تضغط من جهة بحيث يصبح شكلها النهائي على شكل وردة تقريبا
وبعد الانتهاء من الكل يوضعو في صينية ثم في البراد لمدة ربع ساعة تقريبا حتى يكتنزو
يتم تحضير القطر :
كاستين سكر وكاسة ماء وربع ليمونة يغلى على النار
الحشوة:
جوز مقطع (او قشطة طبيعية او قشطة صناعية واذا بدك اشرحلك كيف يتم تصنيع القشطة الصناعية هي سميد وسكر وحليب يتم وضعه في وعاء على نار هادئة حتى يصبح قوامه متل القشطة )وسكر حسب الرغبة وماء الزهر(طبعا ماء الزهر بس للحشوة الجوز مابصير للقشطة وقرفة مطحونة كمان بس للجوز مابتصير القرفة مع القشطة بينتزع منظرها
يتم اخراج العجين من البراد وكل وردة يتم تجويفها بالاصبع (متل الكبة تقريبا)ويتم حشوها بالجوز المخلوط مع السكر وماء الزهر والقرفة حسب الحجم وتغلق ويصنع منها شكل اهليلجي ثم توضع في صينية وتوضع في الفرن ويتم مراقبتها بحدود ربع ساعة الى ثلث ساعة والنار من الجهتين حتى يصبح لونها احمر شهي ثم تخرج وتغطس في القطر
والف صحة وهنا
اذا من قريب عملنا شعيبيات رح صور الطريقة فيديو ان شاء الله وانشرها في المنتدى ولو استطعت لدعوتكم على حفلة شعيبيات بس كل واحد تحت نجمة شو بيجمعكن؟

ابو محمد
خفت تعزمنا لعندك؟؟؟؟؟؟؟؟
استعجلت وجبت الطريقة ع التلفون
عموما تسلم ايديك وايدين ام محمد
المشكلة مسافرة هالاسبوع ع سوريا
مارح الحق اعملهم

الله يسامحك!!!!!!!
حللتم اهلا ووطئتم سهلا
ومن يزورنا سنقول له كما قال الشاعر:
يا صاحبي لو زرتنا لوجدتنا
نحن الضيوف وانت رب المنزل
يعني "البيت بيتكم"

يسلم البيت واصحابو
بيت عامر انشالله

ماشاء الله هي لجين عسولة (بس مين لجين بنتك)
من وين جايبه كل هالحلاوة ( من كتر اكل الشعيبيات يا ابو محمد)
الله يخليها يارب وتتربى بعزكم

نعم هذه ابنتي لُجين(Lojain ) وعمرها الان قرابة الاربع اشهر تقريبا

الله يخليلك ياها يا رب وتربى بعزك ودلالك امين

الله يخليها يارب
والله فكرتها حفيدتك
كنت مفكرتك كبير وشايب اتاريك لسه شباب

وبتقلي بموضوع سابق انا بعمر بنتك
حرام عليك تكبر حالك

عندي بنت تانية صبية عمرها بتاريخ اليوم 14 سنة ويوم وطبعا في ولد اكبر منها خلص تاسع الاسبوع الماضي
اي ختيار ونص

ههههههههههههههههههههه اضحكتني من كل قلبي

من عرف نفسه فما ظلم
فيك البركة
والله يمدك بالصحة والعافية يارب

معك حق ياأبو محمد ... العين حق ....
فهمت علي ....ماهيك ؟؟؟؟؟؟؟؟؟؟؟؟؟؟

شكرا اخ ابو محمد وشكرا لزوجتك الله يخليها لك ويحمي اولادك وشكرا لمرور الجميع

Admin كتب:معك حق ياأبو محمد ... العين حق ....
فهمت علي ....ماهيك ؟؟؟؟؟؟؟؟؟؟؟؟؟؟

سلمك الله
ليلة مبارح ما جانيش نوم
من كتر ما عذبتنا

تحت السيباط كتب:شكرا اخ ابو محمد وشكرا لزوجتك الله يخليها لك ويحمي اولادك وشكرا لمرور الجميع

بالصحة والعافية ان شاء الله
وان شاء الله تضبط طريقة التحضير معكن
واهم شغلة رق العجين ودهنه بالزبدة لو مرتين او تلاتة عشان تتشكل الرقاقات على وجه الشعيبية واللي بتعطيها الشكل الظريف الشهي
والف صحة للجميع

أرسل لي أخوكم " أبو محمد " ...الشمقمق
صور التحضير .....
ياأخي شي بيستاهل الروحة على الإحساء ....

رح أرسلهم صورة صورة....

الأولى ...

الثانية ....

الثالثة ....

الرابعة ....

الخامسة ....

السادسة ...

نأتي بقى للمنااااظر الجميلة
شوووووو هالشقااااااار ....مايبلى
اللي بيدقق ...بيلاقي أنووو الكاميرا ديجيتاااااال .... بدقة ممتازة

الأخيرة بقى مشان ماحدى يعتب علينااااااااا
وهنا أقوووووول ....للأمانة :من لا يشكر الناس لا يشكر الله
شكراً لكم على هذا المجهود .....

والللللللللللللللللللللللللللله فعلا شي بيشهي تسلم ايدين اللي عمل (شكر خاص لاختي ام محمد) واللي صور (الاخ ابو محمد) واللي نقل الصور (الاخ المدير)فعلا شي ناهي مالي قادرة استنى للصبح لاقوم وساويها .

والف صحة وهنا للجميع
لكن فاتنا ان نصور لكم مقطع عرضي بالشعيبية عشان يظهر توضع الجوز داخل الشعيبية عشان الشهية
والكمية المذكورة (5كاسات طحين)تصنع منها بحدود 23-25 شعيبية حسب حجم الكرات المقطعة قبل عملية الرق وملاحظة انه اثناء العجن يضاف مقدار ربع كاسة زيت زيتون ارمنازي معتَّق (حلو)
والفرن لازم يكون حامي من الاعلى والاسفل وبعد اخراج الشعيبيات مباشرة تغطس بالقطر
والف صحة وهنا

تحت السيباط كتب:والللللللللللللللللللللللللللله فعلا شي بيشهي تسلم ايدين اللي عمل (شكر خاص لاختي ام محمد) واللي صور (الاخ ابو محمد) واللي نقل الصور (الاخ المدير)فعلا شي ناهي مالي قادرة استنى للصبح لاقوم وساويها .

بدنا بعد ما تخلصيهن تحطيلنا الصور عشان نشوف النتائج

حرام عليكم موتوني
اللهم ادمها من نعمة واحفظها من الزوال
والله شي بشهي الصراحة ( وانا مابحب الحلو ابدا!!!!!!!!!)
تلسم الايادي

ربي يجعلها صحة وهنا للجميع
الله يديم الصحة والعافية للجميع
يقول رسولنا الكريم صلى الله عليه وسلم:
"من بات امنا في سربه معافى في بدنه عنده قوت يومه فكأنما حيزت له الدنيا بحذافيرها"
او كما قال عليه افضل الصلاة والسلام
اللهم ادم الامن والامان على امة سيدنا محمد صلى الله عليه وسلم وتفضل عليهم بموفور الصحة والعافية وتكرم عليهم برزق كثير حلال طيب مبارك فيه