الصيف.....

يجينا الصيف وننتظره واذا عدى نبيه يعود

ونفرح به اذا جانا ونقول الصيف لا يعدي


نحسب حسابنا بدري نفكر في الليالي السود

نفكر كيف نستانس وكيف نجيب ونودي



ندور للـــوناسه وين شبــــاب قدهـــا وقدود

نسولف مع نجوم الليل ذوات المبسم الوردي



نغير موجه اللهجة حسب جنسيه الموجود

مابين اشلون وعاوز ايه وشوبدك ومابدي



بعضنا فلوسه كثيره وبعضنا بين نقص وزود

وبعضنا مسافر بسلفه وفيزا بس متحدي



يبي ينقط على هذي ويلبس ذيك عقد ورود


يضحكها وهي تضحك عشان يقول من قدي


يظن انه ملك دنياه وودع حظه المقرود

مايدري انه بوضعه غدى في حال متردي



يفاخر بالخطا اللي يصده عن طريق الجود

يضيع نفسه بنفسه ويظن انه بعد مقدي



غلط والغلطة بعشره لرجل يعرف المنقود

خطا وكبر خطا اني اضيع نفسي بيدي



مادام ان العمر يمشي وتالي ذا الجسم للدود

اجل بالله وش حالي اذا حطوني بلحدي