تعالوا معي نتدارس بعض الأمثال الشعبية المفيدة

كل واحد منا سيضع مثلاً شعبياً ونتدراسه ... معناه ... مناسبة قوله ... أصله وفصله ...إلخ
**********************************************************
كلاس مابيغبر على طحان ؟؟؟
بتعرفوا شو بيعني هذا المثل .......ومتى يُقال ؟؟؟؟

حسب فهمي للمثل وبدون الرجوع لمصادر
المقصود ان مهنة الكلاس تصدر غبارا
ومهنة الطحان تصدر غبارا ايضا
والاثنين يعملان بهذه المهنة مما يعني انهما خبيران كل واحد باتقاء الغبار الصادر من مهنته وبالتالي فليس صعبا اتقاء اي غبار اخر
هذا المعنى الظاهر وهو بان للاثنين الخبرة في اتقاء شر هذه المهنة
ويقال المثل
اذا شخص قام يتذاكى على شخص وهو كاشف الاعيبه
فيقول له
حبيبي: على مين عم تلعب ؟كلاس مايغبر على طحان
يعني كاشفك ولعبتك هي ماتمشي عليي
والله أعلم

أحسنت ...أحسن الله إليك ...
شرحت فأجدت الشرح واخترت فأحسنت الاختيار حقا لك كل الشكر والتقدير ....

هات شي مثل من عندك لنشوف ...؟؟؟؟؟؟؟؟

العفو يا ابو معاذ

عز الزيت بخان الزيت والبكي على راس الميت
سبحان الله
كل ما فكرت اغير هالمثل
يخطرببالي فورا
الاستاذ احمد علوظي الله يرحمه
لذلك حطيت هالمثل اللي كان يردده كثيرا
قد يخطر ببال البعض انهما مثلين وليس مثل واحد
لكن الاستاذ احمد رحمه الله
كان دائما يردد هالمثل سويا

((دق المي وهي مي))
شو بتعرفو عن هالمتل؟؟؟

ماأعرفه عن هذا المثل ....
أي مهما حاولت ان تغير طباع الامور و خصائصها فلن تفلح ....

تحياتي لك أخ أبو رامي ...

شكرا على مرورك يا اخي الكريم
والله انا كمان ما بعرفت قصته
بس معناه مثل ما تفضلت حضرتك

عندي كومة امتال شعبية وتردد دائما
لكن لا اعرف قصصها
بس بعرف ايمت بتنقال

الشغلة بالزور والا بالدور؟
مين سمحلكم تحطو مثل قبل ماتعرفوا معنى المثل اللي حطيته؟؟؟؟؟
انا شايف الامور فوضى
شو يا ابو معاذ؟؟؟؟؟

حاضرين ...أمرك يا أبو محمد ....
منرجع للمثل الخاص بك ....
عز الزيت بخان الزيت والبكي على راس الميت

عم نلطف الجو لا اكثر
وشكرا يا ابا معاذ

لا نعرف

لماذا لم يتم اكمال الامثال
وخاصة معنى المثل الخاص بعمي ابو محمد

عز الزيت بخان الزيت والبكي على راس الميت

وانا بقول شو معنى:

اللي بيعرف بيعرف واللي مابيعرف بيقول كف عدس؟؟

معناه والقصة الذي قيل فيها اول مرة

بدنا أهل الخبرة بهذا المجال .....
وهذه دعوة مني للمعنيين بهذا الأمر أن يفيدونا بما لديهم من خبرة ....

بإنتظار ردودكم ....
تحياتي ...

بالنسبة لسؤال شاهر السرداني عن المثل
((( اللي بيعرف بيعرف واللي ما بيعرف بيقول كف عدس )))

لكن هل سأل أحدكم نفسه ماهي قصة هذا المثل ؟

قصة المثل قالها لي جدي الله يرحمه ، حيث إنه سابقا في أيام نظام الحارات نط حرامي على سطح بيت رجل وشاهد كيس عدس وكان راح يسرقه فقلب العدس بيده وأخذ منه جزءأ في كفه في نفس وقت مرور إحدى نساء الدار في ساحة المنزل ( ماكانت تسمى بأرض الديار ) ، فصرخت المرأة وخرج زوجها فشاهد الرجل الذي هرب ومازال العدس في يده ، وطبعا كما هو معروف وقتها كان الذي تصدف ويشاهد إمرأة وهي بدون حجابها يكون جزاؤه على الأقل أن يتم ضربه ضربا شديدا يعدمه العافية هذا إذا لم يتم قتله ، فلحق الزوج باللص ورأوه الناس وهو يلحق اللص وفي كفه كمية من العدس ولم يكونوا يعلمون عن موضوع كشفه لزوجة الرجل فقالوا : كل هذا الصراخ والمشاكل من أجل كف عدس !!! فقال شخص مطلع على الموضوع : اللي بيعرف بيعرف واللي مابيعرف بيقول كف عدس ، فذهبت مثلا .

بالنسبة للمثل الذي اورده اخونا ابو محمد
عز الزيت بخان الزيت والبكي على راس الميت
انا بعرف البكي على راس الميت
يعني عندما يطرح اي موضوع
ان كان بيع او شراء او رهان
لا يؤجل الدفع او اي شيئ من الاتفاق
ويكون كل شيئ حاضر
فيقول البكاء على راس الميت
اي مو بعد ما يموت الانسان بشهر مثلا الواحد بيبكي
يعني بتتنفذ الامور بنفس الوقت
اما بالنسبة لــ عز الزيت بخان الزيت
ما بعرف شو معناها
في براسي معنى بس ما عندي التعبير انو وصلو
تقبل مروري ابو محمد

المثل الثاني بعد حل مثل ابو محمد هو

عندما نشعر بالبرد الشديد
فأننا نقول وبدون شعور
((((( برد سليماني ))))
من اين اتت هذه المقولة
ومن يرددها

مشكوريين على جهودكم يا شباب والله حلوين وجداد
يا لطيف شو حلوين

(اذبح قطتك ليلة دخلتك)
وفي هذا المثل قصة لطيفة وظريفة: يقال: أن رجلين تزوجا في يوم واحد، أما أحدهما فكانت حياته مستقرة تمام الاستقرار، بينما الآخر في حياة مضطربة صاخبة، مليئة بالمشاكل الأسرية والضرب والصياح، وفي يوم قال الرجل -صاحب المشاكل- لصاحبه: أنا لا أسمع صوتك ولا صوت امرأتك، وأنا كل يوم في نكد، فقال: إن حياتي هانئة جداً، وممتازة، فقال له: ما الذي صنعته؟ فقال: في أول ليلة الزواج كنا نأكل لحمة مع بعض وهناك قطة قربت مني فأمسكتها وذبحتها بالسكين -فهابته المرأة فاعتدلت- فقال: هذه نصيحتك؟ قال: نعم. فذهب إلى السوق واشترى قطة ووضعها في البيت، وأتى بلحمة وجعل يأكل هو وزوجته، وجاءت القطة، فقام وأمسك القطة وذبحها، فقالت له زوجته: هذه فاتت عليك، (اذبح قطتك ليلة دخلتك)، أي: هذا الفعل جاء متأخراً، فلو أنك فعلت هذه الفعلة ليلة الدخلة كنت أتيت بنتيجة.

سؤالي للرجال فقط
هل فعلتم _او ستفعلون _ كما فعللا؟؟؟؟؟؟؟
وان كنتم فعلتم هل أجدى ذلك نفعا؟؟؟؟؟؟؟

ههههه ... حلوة ...
ولكن على ماأظن أن هذا المثل قليل التداول في أرمناز ....

صار للشرشوحة مرجوحة ...ولأبو بريص قبقاب

باللاذقية في مثل يشبهه
صار للدبانة دكانة وصارت تفتح ع بكير

في متل بيقول اللي استحو ماتوا

وهي قصتو كان في ناس بحمام السوق صار حريق بالحمام

ناس هربت وطلعت قبل ما تلبس وفي ناس أستحت تطلع وماتت


مشان هيك قالو اللي استحو ماتوا

لا تنسى ذكر الله كتب:في متل بيقول اللي استحو ماتوا

وهي قصتو كان في ناس بحمام السوق صار حريق بالحمام

ناس هربت وطلعت قبل ما تلبس وفي ناس أستحت تطلع وماتت


مشان هيك قالو اللي استحو ماتوا

فضلا لا امرا
http://www.armanazi.net/t2057-topic?highlight=%D8%A7%D8%B3%D8%AA%D8%AD%D9%88%D8%A7

شكرا اخي الكريم للتوضيح

بس متل ما بتعرف ثقافتي على قدها وانا حبيت شارك معكم

ونقلت الموضوع متل ما وصلني

وبعدين شو بيجبنا الكم ما شاء الله تبارك الله عليكم

نفع الله بكم الامة الاسلاميه وزادكم علما


بيقول المتل العين ما بتعلى على الحاجب

لكم احترامي وتقديري

فيكي البركة ياأُخية وبامثالك الكرام
شكرا على دماثة الاخلاق والاطراء اللطيف

لا فعلا نحن لازم نشركم على ها المنتدى وعلى هالمواضيع الرائعة والقيمه

جزاكم الله خيرا وجعل أعمالكم في ميزان حسناتكم

اللهم اجعلنا هادين مهديين
ولاتجعلنا ضالين ولا مضلين
واجعلنا من عبادك الصالحين