مسابقة السفرة الرمضانية

طبعا هذه المسابقة راح نزلها و نتركها على جنب و راح نبلجها في اول يوم من رمضان
و المسابقة راح اتكون على الشكل التالي و يا رب تلاقي تفاعل و اهتمام من الاعضاء و العضوات

كل عام وأنتم بألف خير جميعا أخواني وأخواتي في أسرة منتدى ارمناز




بمناسبة شهر رمضان الكريم تقدم لكم اختكم الاميرة نواعم مسابقه أحسن سفرة رمضانيه


جميعنا نعرف أنه تكثر الأكلات على وجبة الفطور في رمضان, وكل بلد وكل منطقه تتميز بأكلاتها
وترتيبها للسفره الرمضانيه. لذلك حبينا نعمل هالمسابقه ويجب أن تكون السفره مصوره



*شروط المسابقه*



-تصوير السفرة كامله وتكون مكوناتها الاتي:



-الاطباق الرئسية




-المقبلات




-الشوربة





-المشروبات الرمضانيه




-الحلويات الرمضانيه




سيكون التقيم علي



-تنسيق السفرة




-التنويع في الاكلات



-جودة الصور






* ترشيح أحسن سفره ستتم بعد أنتهاء شهر رمضان بأذن الله*

و الجائزة بعطيها الادمن
هههههههههههههههههههه

بس لا تخاف يا ادمن اكيد راح اتكون بس اوسمة
ههههههههه

فكرة حلوة ...
اللـــــــــهـــــــــــــم بارك لنا في رجب وشعبان وبلغنــــــــا رمضــــــــان اااااااااااااااامين شكرا اختي " الأميرة نواعم " الله يعطيك الف عافية ...
بس بدي حول الجائزة لشخص يمكن بتعرفيه ......
على الله يقبلها ....

طيب مين ها الشخص
هلق صار لازم تقلي لانك زرعت فيا حب الفضول ههههههه
مع انو ابصراحة كل الناس هون بالمنتدى تستهال الجوائز لانهم ناس طيبين و راقيين
بس على مين وقع الاختيار يا ترى ؟؟؟

اختي

بهالحالة انا واهل بيتنا ما رح نتعبد في رمضان
ورح يضيع علينا الشهر من اجل نفوز بالجائزة

يا حاج " أبو عبدالله " ...
لا تعقدها كتير ... " وروح النفس تارة بالمباح " ...

جزاكم الله كل خير....

خييو ما حدا غصب على شيء
لا تشارك منشان ما يضيع منك اجر رمضان و نصير نحنا كمان مكتسبين سيئات بسببك
هيك انتو بتكسروا معنويات الواحد
و يحرم ما يشارك بمنتداكم
انا اسفه عن جد

و لعلمك اخي ها الصور اللي انت جبتها ما هي فخر للدول الاسلامية ابدا
لانها مضيعة و اسراف و ان الله لا يحب المسرفين
اللي عملوا هيك اناس متخلفين و ما فكروا اديش من نعمة رب العالمين ضاعت بها السفرة

لا حول ولا قوة الا بالله

ياشباب الواضح انو في توتر صلو على النبي بتنحل كل الامور

يا اخي انتو الواحد بيتعب منشانكم و بجيب مواضيع
و بدل كلمة شكرا ..لاء و العتب علينا كمان قال شو راح نلهيه عن الذكر برمضان
خييو ما حدا بدو يجبرك تيجي
اتفرغ للعبادة ربنا يزيدك اجر و منفعة

اللهم صلى على سيدنا محمد و على اله و صحبه اجمعين

السلام عليكم و رحمة الله

السفرة الرمضانية فارغة
عم تستنى مين بدوا يكون اول متطوع يصورلنا المائدة الرمضانية
و يجيبلنا الصور و يورجينا عاداتهم بالاكل و كيف بتترتب سفرتهم
يلا يا ابضايين مين بدوا يكون الاول

انا رح اكتبلكم كتابة
متل ما بتعرفو نحنا عايشين بالسعودية وكتير احيانا نطبخ طبخات سعودية
فمثلا اليوم طابخين على اول رمضان
كبسة بلحم الجمل

وجنبها تبولة شامية
وعرقسوس شراب بارد من السحور نقعناه وحطيناه بالفريزر
والحمد لله نعمة كريم
وشوية خضار حوالين الكبسة
فجول ومن هيك اشياء
بس ان شاء الله مافي اسراف ولاتبذير بالسفرة
امنيتي اني استطيع اني اعزمكم على الفطور برمضان لانال اجر تفطير الصائم
بس صور وماصور
ليش بس يقول الشيخ الله اكبر مين فاضي يصور
الله يسامحك اخت نعمة
ههههههههههههه
والعادة الفطور ينزل قبل الاذان بدقائق عشان يظل ساخن اشهى
وشكرا
والف صحة للجميع
وصياما مقبولا وافطارا شهيا باذن الله

اول شي
يا جماعة صلو على النبي
انا كتبت مشاركتي السابقة بدون ما اشوف مشاركات الزملاء
الموضوع بسيط
الاخ ابو عبد الله اكيد اليوم عطشان كونو اول يوم صيام بيني وبينكم معاه شوية حق
والاخت نعمة كمان الله يجزيها الخير عم تفعل هذا الجانب
والموضوع كيفي اخ ابو عبد الله
خلاص؟
ماتت بارضها؟
ضاعت ولقيناها؟
خلصونا
لساتنا اول يوم برمضان مو معقولة
لكن ب 25 رح تسحبو السلاح على بعض
ههههههههههههههههههههههههه
ترى عم حاول لطف الجو
بعدين هلق بتقولو الشمقمق حكى
يعني اذا حكى الواح بتقولو الواح حكى
واذا ما حكى الواح بتقولو الواح ماحكى
وشو بدو يحكي الواح ليحكي
قرب الاذان الله يرضى عليكم
انا بالشرقية وباقي حوالي 7 دقايق تفضلو ياشباب

هههههههههههههه
عن جد ضحتني يا شمقمق
يعني ما حدا فاضي يصور سفرتوا الرمضانية
طيب شو رايكم انو انا راح صورها ان شا ءالله و راح جيبلكم الصور
الشغلة كثير سهلة ما بتاخد دقيقة
يعني وقت السفرة اتكون جاهزة و انت واقف تستنى الاذان
اعملها صورة صغيره
بسيطة يعني
ههههههههههههههههههههههههه

لاشك انو ما بتاخذ وقت
بس يا اخت نعمة
هذا الوقت ثمين فيما صح عن النبي صلى الله عليه وسلم انه قبل فطر الصائم له دعوة مستجابة
لان للصائم فرحتان
فرحة بلقاء ربه وفرحة عند فطره او كما قال الحبيب صلوات ربي وسلامه عليه
فهل اجمل من لقاء الله ؟
وهو الكريم الجواد الرزاق الوهاب

خلص يا جماعة انا اسفه لاني فكرت اشغلكم بها الفكرة
عندك حق خييو الشمقمق شكرا لافادتك الرائعة
بتمنى من الاخ الادمن يحذف هذا الموضوع او يخفيه
و الشكر مسبقا له

لاتزعلي يا اخت نعمة
مجرد وجهة نظر
لاتحذفي الموضوع ولا شي

ولو خييو شمقمق ما في زعل
اهلين فيك
بس من الاحسن ينحذف الموضوع

أختي الكريمة ...
أفضل عدم حذف الموضوع ...
أظن هذه الفكرة قد تروق لآخرين ...
وخصوصا النساء ....
سأستعين بمشاركة لأخينا " أبو عبدالله " ....
وهي صورة سفرة أرمنازية .... فيها عروس السفرة الأرمنازية " الكبة النية "


بإنتظار المشاركات الرائعة من قبلكم ...
على فكرة مارح نتركك ، بدنا صورة لسفرة مغربية من عندك ....
تحياتي

ضاعت ولقيناها
ونحنا هون اخوة باذن الله
---
دعونا نسأل الله الرحمة والمغفرة والعتق من النار لجميع المسلمين
الاحياء والميتين
ولاتنسوا اننا اخوة في الله
والدعاء بظهر الغيب مستجاب باذن الله
اللهم تقبلنا عندك
وتجاوز عنا بكرمك
واقبلنا مع العتقاء في هذا الشهر
-----------
والله كنت ناوي اليوم اصور السفرة بس نسيت
خلص بكرا رح حاول اصور السفرة
وعشان ماحدى يزعل
رح صور السفرة واردفها بدعاء حلو ان شاء الله

الله يبارك فيك ....
بإنتظارها...

[img][/img]

ماعم تزبط معي
والله ما نسيتكم صورت السفرة بس كيف بتتنزل ما عم تزبط معي

https://2img.net/r/ihimizer/img820/3994/dsc04247b.jpg

ترى ماضبطت الصورة انزلها غير بهالطريقة
كان بودي انزلها كصورة مو كرابط

ان شاء الله تكون اعجبتكم السفرة

بعد اذنك يا شمقمق
تم الانزال

شكرا ابو عبد الله
الله يديم النعم
ويحفظها من الزوال
وصحة وهنا
صياما مقبولا وافطارا شهيا باذن الله
-----------
مع ملاحظة انو الصورة عندي انا أخذتها على الواقف
لذلك الصحون مبينين صغار شوية
بس ان شاء الله المرة الجاية رح اخذ الصورة اقرب شوية
بس اظن دقة الكميرا العالية (12.1 ميغا بكسل)
بتسمح بتكبير الصورة وتوضيح التفاصيل

ان شاء الله تكون ظبطت هالمشاركة طوشناكم بمشاركتنا
ماتواخذونا
بس كنت عم جرب تنزيل الصور

وان شاء الله
في الايام القادمة كل ما اتزكر عند الفطور رح اخذ صورة
واحطها بالمنتدى
وعسى تنال اعجابكم

بس الي بدي افهمه ليش ما عم يطلع غير نص السفرة
النص التاني وين عم يروح ؟
اليسار ؟

لا ....لا .....لا.....لا.....لا
الله يسامحكم ...شو هاد ...الدنيا صيام ...
عم تشهونا حرام عليكم ....
مابرضى بقى إلا بعزيمة.....
تصرفوا ...دبروها بقى ....

الله يبارك للجميع ...
ويديم علينا الصحة والعافية ....
اللهم آمين